الحلقة الاولى ..
بقلم طارق اللبيب .. .
والله يابتي قدر الزول ما يتشاءم .. ويقول انا شوم .. الشوم بقعد ليهو فوق خشم الباب ..
انا شخصيا ..قدر مانضمت مع امك دي ..خشمي ده اتشرط .. مانفع معاها ..
بس تقوم من الصباح تهرج .. وتقول والله نحن الفقر والشوامة دي كلو كلو مي خاتيانا ..
والله نحن اصلو الخير مايجينا ..بس ده كلامها .. اعوذ بالله يابتي من مناداة الشوم ..
ده عمك البشرى .. بتكلم مع بتو ثويبه ....
في بيتهم في الثورات .. الكلام ده كان زي الساعة 8 صباحا"
قالت ليهو والله كلامك حقيقة يابوي .. يعني الزول لو قعد يشكي .. الفائدة شنو؟ يعني الشكوى دي حتشيل منو المعاناه.. ؟؟
قال ليها بالعكس يابتي ..كترة الشكوى بتزيد الهم وبتزيد الغم وبتضاعف الشر ..
والزول يعيش عمرو كلو حاسي بالكعب فوقو والكعب جنبو .. والكعب جواهو ..
ويكون مقلق ويائس وصاري وشو الاربعة وعشرين ساعة ..
وحتى يسبب قلق وتوتر للناس الحلولو ..
بعدين يعني هو بشكي لي منو ؟؟ وبشكي في منو ؟؟
قالت ليهو اكيد يابوي بشكي في ربنا .. وبشكي للمخلوقين الضعفاء ..ال لا بنفعوهو لا بضروهو ..
قال ليها اها يابتي في داعي لي وجع القلب ..؟
عمك البشرى راجل واعي.. وزول حكيم والظروف والتجارب عركتو عرك عجيب ..
اصلا هو جا من البلد بدري .. كان مع ابوهو واخوه في البلد . عندهم واطه وشغالين في الزراعة ..
اخوهو قعد في البلد مع امه وابوهو .. وهو كتب تنازل من الملكية بتاعة الواطة لاخوهو بعد وفاة ابوهو .. وواصل مسيرتو التعليمية .. لغاية ماجا الخرطوم وقرا الجامعة واشتغل قبلو .... واتزوج من بنات امدرمان .. وسكن في الثورة من بداية التمانينات ..
كان موظف في الحكومة .. كان مع شغل الحكومة عندو تكسي وحالتو مستورة ..ونص البيت الساكن فيهو ده اشتراهو في الوكت داك.. اها شالوهو الصالح العام .. وحالتو اتبشتنت وباع التكسي واتدهور شديد .. وهسي شغال في طرمبة عامل بكب البنزبن للعربات .. وشغلو بالوردية اسبوع بشتغل بالصباح ..واسبوع بشتغل بالمساء ..
زوجتو زينب .. صغيرة وجميلة 39ىسنة هو اكبر منها بعشرة سنوات.. .و انسانة طيبة .. بس عندها حبة غباء وبتتاثر سريع بالحاجات الحولها ..
كان جاتها في البيت مراة لابسة دهب ساي.. اليوم كلو تلقاها تتحسر وتنقنق ..
انا يا يمة اهلي ماجدعوني جدعة اللحمة للكلب ..
اريتني يايمة اليوم داك كان مشيت لناس خالتي في مدني ..على الاقل كان عرسني عمر ود خالتي ..وهسي اكون مرة المحافظ ..
وعمك البشرى يسمع فيها ويتبسم .. ماحصل يوم قال ليها الحاصل علينا ده كلو بي سببك ..وبي سبب نقتك .. وهي مازالت مستمرة ..
عندو منها ثويبه ..البت الكبيرة دي 21سنه.. وولدين صغاراحمد 13 ويوسف مسمنو على خالو عمرو عشرة سنين ..
عمك البشرى كل يوم بتكلم مع زينب .. بي كل ادب وتقاؤل .. وبحاول ويوصيها .. هو راجل متفائل وخلوق بس هي على العكس شديد ..
والكلام مابنفع معاها ..وكل مايحاول يتكلم معاها بتحرجو ..
اها يازول الاولاد نشأوا عندهم ولاء لابوهم اكتر من امهم..وبحبو ابوهم محبة فوق الحد المعقول ..
لانو ابوهم قريب منهم ..وبحسسهم بالسعادة والفرح .. وبقول ليهم نحن كويسين.. ونحن ناجحين ونحن احسن من ناس كتار ..
ونحن ماقاعدين نجوع .. وبناكل اي حاجة .. كسرة يابسة.. رغيف ناشف.. ملاح بصل ..
المهم مابنحتاج ولابنشحد . والحمد لله على نعمة الصحة والعافية ..
وامهم بتقول ليهم انتو شوم .. وابوكم شوم .. نحن ناس قحطانين ومقطعين ..
اي حاجة تحصل ..امهم تعمل فيها درامة عجيبة ..وتقلب البيت فوق تحت .. وابوهم بسهل الامور
وبمشي اي حاجة .. وفتحة خشمو يقول ليهم مافي عوجة والجاي احلى
وموش كدا بس ..بتكلم معاهم عن كل محاسن الاخلاق .. وبقص ليهم قصص تجاربو في الحياة ..
البت دي شاطرة شطارة بصح.. واتخرجت من محاسبة ..بتقدير ممتاز.. لكين كالعادة شايلة اوراقها وحايمة ومالاقية شغل ..
وهسي النقاش الصباحي ده .. في الموضوع ده ..
ثويبه ..لمن لفت كتير ومالقت شغل امها قالت ليها اقعدي في البيت ده .. انتي اصلك شوم ومابتلقي اي شغل ..
ابوها قال ليها اوعك تستسلمي يا ثويبه لانك انتي هسي شغالة ..
قالت ليهو شغالة كيف يا ابوي؟ قال ليها موش انتي ساعية .؟ السعي للشغل من صميم الشغل ..
بس ما تخلي اليأس يسيطر عليك ..
وحاولي وحاولي وحاولي .. وان شاء الله في النهاية تتوفقي ..
المهم يازول بعد النقاش الصباحي ده الولدين مشو المدرسة .. والبت طلعت مع ابوها على المواصلات ..في الشارع كان بحكي ليها في قصة ..
قاليها عارفة يا ثويبه .. انا اول ما قدمت للشغل مع الحكومة .. اصحابي كلهم اتفقوا انو انا ما ح اشتغل وحافشل في اول معاينة .. وفعلا حصل وطلع كلامهم صاح .. وقدمت للدفعة الجاية واصحابي قالو نفس الكلام (حتفشل وما حيشيلوك ).. وبرضو ما اتوفقت ..
بس كنت مصر المرة الاخيرة قدمت وابيت اكلم اصحابي ومافي اي زول قال لي انت بتفشل .. تصدقي نجحت .. بس انتي واصلي السعي وما تختي بالك في الاحباطات بتاعة امك دي .. واثبتي ليها انك ناجة وموفقة ..
مشت ثويبة وكلها تفاؤل وفرحة وسعادة ولمن ابوها فات منها كدي عاينت ليهو وقالت . الله يخليك لينا يا ابوي انت امل حياتنا ..
يارب القى لي شغل عشان على الاقل اقدر اساعدك في مصاريف البيت ..
كان في ناس شركة مدنها مواعيد .. ودي المرة التالتة .. وهي مصرة تمشي ليهم كل مرة ..

الحلقة 2 ..
بقلم طارق اللبيب ..
ـــــــــــــــــــــ...
اها يازول عمك البشرى مشى على طرمبتو .. الطرمبة حقة واحد اسمو خضر .. ساكن على جيهة سوبا كدا .. وعندو علاقة طيبة مع عمك البشرى .. وعارفو وعارف امانتو .. ونشاطو في العمل
وخوفو من ربنا .. كل العمال في الطرمبة بحبو البشرى محبة عجيبة وغريبة وباقي ليهم زي ابوهم ..

وبحل ليهم مشاكلهم بي افكارو وبي رايو .. والزول البجي يكب بنزين زاتو البشرى بتبسم معاهو ويديهو كلمتين زي السكر يطعم ليهو يومو كلو ..
مرة في واحد جا يكب بنزين وكان اليوم داك الدورية بتاعة البشرى .. قال ليهو اكب ليك بي كم ؟قال ليهو بي تمانين .. فتح التنك وركب المسدس .. وقال ليهو كيف الدنيا عاملة معاك؟ .. ان شاء الله رايق ..
داك قال ليهو ياعمك خليك مع شغلك ده.. سيبني في حالي ..
قال ليهو اسأل الله يزيل عنك كل هم قول امين .. قال ليهو انت يا حاج شكلك ملحوس صدق؟ ..ومادي ليهو ورقتين ام خمسين ..
البشرى ضحك وهو بستلم في القروش وقال والله لي زمن ماسمعت كلمة (ملحوس) دي الله يجازي محنك ضحكتني ..
الزول ده مشى ونسى الباقي .. من كترة الدهشة والتفكير في الزول الغريب ده ..
البشرى بقى يكورك ليهو يازول باقيك باقيك .. قال ليهو خليتو ليك خليتو ليك هههه..
.
اها نمشي لي ثويبة طبعا " وصلت الشركة ..ولقت اللجنة بتاعة الاستيعاب لسع ما اكتملت .. وهي اساسا لجنه مكونة من نفرين ..
اها ثويبة كانت منتظرة قاعدة بره .. ومعاها كم بت كدا .. منتظرين زي ماهي منتظرة ..
قاعدة في مدخل الشركة .. الشركة عمارة من طابقين كدا تقريبا هي شركة استيراد وتوزيع .. مختصة بالادوات المكتبية ..
والمدخل ده مدخل الباب الكبير بتاع الحوش الخارجي مفتوح كويس.
والحوش زاتو زي زقاق كدا واقع في الناحية الشمالية للعمارة فيهو الحمام الخارجي في الناحية الغربية والوضاية على الحيطة الشمالية .والباب الرئيسي فاتح للجهة الشرقية ..
والبنات قاعدات فوق كنبة بتاعة حديد في ضل العمارة .. كل واحدة حاقبة سنطتها وشايلة فايل بتاع الشهادات الاصلية
مع انو صور الشهادات سلموها.. لكن برضو مامعروف تاني يطلبو شنو للضمان الزول بشيل معاهو عدة الشغل ..
البنات ديل قاعدين لغاية الشاعة 11 ونص مافي زول قال ليهم تلت التلاتة كم؟
اها في قعدتن دي في واحد شاب كدا شكلو شياكة ولابس لبس رهيب ومسرح ششعرو لي ورا ..
وجزمتو دي تشوف فيها وشك شدة مابتلمع ..
ودخل من الباب خاشي ظت .. ظت .. ظت ..
البنات كلهن رفعن راسن بعاينن ليهو ... ولمن شافنو قعدن مقهيات فيهو .بدون اي خجلة ..
ثويبة شوية كدا عندها حياء دنقرت راجعة سريع ..
وهو بقى مركز في البت الدنقرت راجعة دي ..
الود جاء طوالي على البنات وقصد ثويبة بالذات . وقال ليها اوراقك لو سمحتي ..
قالت ليهو .. لشنو؟
قال ليها موش انتي جاية للشغل ولا حاجة تانية .؟
قالت ليهو فعلا".. قال ليها طيب جيبي اوراقك ومادي يدو كدا .. جيبي اوراقك .. ثويبة اترددت شوية لانها ماعارفاهو ده منو .
واحدة من البنات قالت ليها .. اديهو اوراقك مالك انتي متردده كدا .. يعني حيأكلهم؟؟ .. ماحيشغلك ..
مدت ليهو الاوراق .. قال ليها تعالي وراي ..
مشت وراهو ..
طلع بيها الطابق الاول . ومشى ليهو على مكتب مكتوب عليه شؤون الموظفين ..
قال ليها انتظري هنا .. برة ..
انتظرت شال الاوراق وخش جوة .. اخد ليهو بالضبط تلاتة دقايق .. وجاها طالع .. مدا ليها فايلها .. وقال ليها خشي ليهم .. وفات طوالي ..
خشت ليهم لقت نفرين . قالت السلام عليكم ..
واحد قاعد كدا شكلو في العمر قريب لابوها .. لابس بدلة اشتراكية ..
قال ليها مرحب مبروك الوظيفة ..
قالت ليهو بس الزول ده منو .. ؟
قال ليها معقولة ؟؟ الزول ده منو؟؟ !! كمان بتسألي؟ وهو قبل دقيقة قال دي قريبتنا شغلوها ..؟؟
قالت ليهو الحقيقة انا اول مرة اشوفو ..
قال ليها في الحقيقة يا السمحة .. ده ولد صاحب الشركة .. واصلا بشغل البنات السمحات زيك كدا ..
قالت ليهو بالمناسبة انت في مقام ابوي .. وانا ن واجبي ما ارد عليك الا بالاحترام ..
وكمان ما ح ازعل من كلامك ..
وحأركز في اجمل حتة في كلامك ..
قال ليها اللهي شنو اجمل حتة في كلامي؟؟ .. قالت ليهو .. كونو زول مابعرفني وقال انا قريبتو ..
دي حاجة كويسة .. وماشرط يكون السبب عشان انا سمحة احتمال في سبب تاني ..
قال ليها حيكون شنو اسبب التاني ياعمري ؟
قالت ليهو الله اعلم .. والغايب عذرو معاهو .. والحاجة دي ما ممكن يجاوب عليها الا هو ..
قال ليها ده عاااامر .. انت ماسمعتي بي (عامر كلتشي) ولاشنو؟
هههههه والاتنين ضحكو .. وقال ليها المهم يا ستي .. انتي بكرة تجي تباشري الشغل ..
وجواها بقت تتكلم .. اسمعي ياثويبة اوعك يستفزوك وتغضبي .. ولا توتري نفسك .. واعملي الموضوع عادي .. خليهم يضحكو .. اوعك والتوتر والاحباط .. اتذكري كلام ابوك ..

انا الشربانة موية النيل طهارة وعـفة ..
وانا البت المتل عسل البنوني مصفى..
ابوي شـايفني زي دهبا" تقل ماخفا..
مابيغروني بي فكة ووظيفة وحـرفه ..

.ده كلو كلامها مع روحا ..

قالت ليهو شكرا ليك ياعمي .. ربنا يديك الصحة والعافية ..
قال ليها امشي امشي بلا عمي بلا هوس معاك .. وباكر الصباح تعالي قاشرة كويس عشان عامرا ..
قالت ليهو حاضر ياعمي ..وابتسمت ومشت ..
الزول التاني قال ليهو البت دي يا اما هبلة يا اما خبيثة ..
قال ليهو كيف؟؟ .. قال ليهو والله اصلا ما اثر فيها الكلام ..ولا حركت ساكن ..
قال ليهو والله انا لاحظت ليها .. واستغربت شديد لمن خفت انو يكون عندها ضهر وتخرب بيتنا ..
قال ليهو والله ماتستبعد يكون عندها زول ايدو لاحقة .. يقوم يغتس حجرنا ..
والله سكاتها وابتسامتها دي فوق راي الله يستر غايتو ..
الزولة دي لو حكت لي عامر ساي بقطع عيشنا ..
المهم ثويبة طالعة كدا وشايلة الفايل .. والبنات التلاتة لسع قاعدات برة منتظرات ..
اول ما شافنها قالن ليها تعالي تعالي .. قالو ليك شنو؟
قالت ليها الزول ده شال مني الفايل .. ودخلو ليهم .. وقالو لي بكرة تعالي باشري الوظيفه ..
واحدة من البنات قالت ليها تفتكري اختاروك ليه؟ ..
والزول ده عزلك من نصنا السبب شنو؟ ..
قالت ليهم والله السبب ده انا طبعا" مابعرفو .. لكن ممكن السؤال ده يتوجه ليهو هو ما أنا ..
قالت ليها والله امكن انتي مابتعرفي لكن نحن بنعرف ..
قالت ليهم طيب انا ماعايزة اعرف شغلوني وخلاص .. لانها عارفة عايزين يقولو شنو ..
وماعايزة تسمع كلام يأثر على نفسياتها ..
المهم قالت ليهم ان شاء الله ربنا يقسم ليكم شغل ....
انا تعبت شديد عشان الشغل ده ودي المرة التالتة اجي هنا ..
اها مع السلامة وموفقين ان شاء الله ..
برضهم مستغربين في البرود الغريب البتتعامل بيهو البت دي ..
اها طبعا مشت ركبت على البيت وفي الطريق كانت بتفكر في كلام الناس ..
ومعقول يكون الزول الاسمو عامر ده هدفو كدا ..؟
ومعقول الناس ديل كلهم كلامهم غلط؟ وكمان العم الكبير ده مستحيل يكذب ..
وكان بتكلم بي ثقة .. في النهاية قالت .. مامشكلة انا بعرف احمي نفسي كويس ..
بس لازم اشاور ابوي واخد منه الراي الصح .. لو قال لي سيبي الشغل زاتو بسيبو ..
وصلت البيت وبشرت امها .. وقالت ليها اها يا امي كلام ابوي طلع صاح انا لقيت شغل ..
بس كدا .. وماحكت ليها كيفية الاستيعاب تمت كيف..
ومنتظرة ابوها يجي من الشغل .. عشان تحكي ليهو الصورة كاملة وتشوف رايو ..
ونحن كلنا منتظرين بشرى يجي عشان نشوفو بقول شنو؟

لحلقة 3
بقلم طارق اللبيب ..
ثويبة بت البشرى بنية قمحية..
لونها..بيشبه ..لون الرملة الفوق القيف..
لمن ترجع منو الموجة..
ويعكس فوقو شعاع الشمش الدافية ..
مع انها فقيرة وابوها زول عامل .. حتى هدومها مازي هدوم البنات .. اللبسة الواحدة بتقعد معاها سنتين ..
بس انسانة نضيفة ..وبتهتم بمظهرها بقدر المستطاع ..
طبعا مابتستعمل في وشها من حاجات البنات ولاحتي في حدود (قدر ظروفك) ..
لانو لو عندها حقو .. فاخوها احمد او يوسف محتاج لي حق الكراس او قلم الرصاص .. وحق الفطور ..السندويتش بتاع الطعمية بقى بالشي الفلاني ..
بدل ما تجلبط وشها ..بتوفر لاخوانها الاساسيات التعليمية ..
ودايما في البيت مشغولة بي حاجة .. تطرز في فوطة طربيزة .. بتعمل اشكال زهريات .. بتفنن في حاجات كدا ..المهم ..
اليوم ده لمن جات ومنتظرة ابوها كانت الساعة واحده وربع .
جات تعبانة ومرهقة اتوضت وصلت ونامت .
في النومة النهارية دي ..جو اخوانها الصغار من المدرسة ..وكانو بلعبو وبتكاوو .. بعد شوية بقو يتجادعو بالمخدات.. ويتساككو في الاوضة .. وويطلعو في السرير ده وينزلو من ده .. واختهم نايمة ..
ولاصحت بالجوطة من شدة الارهاق .. لامن جاتها مخدة طايرة وقعت ليها في وشها.. صحت من النوم مزعوجة شديد..
وخاتة يدها في راسها وبتبكي ..
احمد الكبير قال ليها انا اسف ياثويبة ..معليش والله تاني مابنعمل كدا .. ماتبكي ..
مسكتو عليها قالت ليهو لالا ياحبيبي .. انا ما منزعجة منكم ..
انا بس شفت حلم ازعجني شديد ..
وصحيت خايفة .. ماتشيل في بالك حبيبي .. واصلو في اللعب بس ماتطلعو في السراير بتقعو ..
قال ليها شفتي شنو في النوم ؟.. انا زاتي قاعد اشوف التمساح ساكيني واصلو ماقاعد يلحقني ..
بس مرة واحدة كنت جاري منو وكرعيني بردن ووقعت قام قرم لي يدي اليمين ..
قلت انا تاني الا اكتب بيدي الشمال وهو بضحك ..
قالت ليهو .. ان شاء الله يا بوحميد ماتحصل ليك اي عوجة ..
انت تاني اتحصن ونوم ..
قال ليها كويس .. وجاتو ليك مخدة طايرة من يوسف في وشو ..
هي قعدت تضحك ودمعتها في عينها ..
مشت لقت امها في المطبخ بتعمل في ملاح رجلة بدون لحمة ..
قالت ليها ممكن اساعدك يا امي شوية .. قالت ليها انا خلصت يابتي .. هو شنو ما بصلة فوق موية وعليها رجلة مفرومة ..
ابوك الليلة بجي بعد المغرب كلمي اخوانك تعالو اتغدو ..
قالت ليها يا امي اناشفت حلم كعب ممكن الحلم ده يكون فيهو حاجة ماكويسة؟
قالت ليها احكي لي ..
قالت ليها انا شفت جاء هوا اسود شديد زي الاعصار وضرب في حيطتنا المقابلة الشارع دي الفيها الباب . والحيطة وقعت والباب طار مع الهوا ..
ونحن بقينا قاعدين في الشارع ..ونتغطى من الناس الماشين في الشارع بالملايات ..
قالت ليها ان شاء الله خير يابتي .. ده حلم شوم .. الله يستر ..
خلاص تاني ماتحكيهو لزول.. قالو الحلم الكعب الزول مايحكيهو . قالت ليها شايفاك الليلة متفائلة شديد.يا امي .
عشان شفتيني اشتغلت ولاشنو؟ واتبسمت معاها ..
قالت ليها ربنا يوفقك ياثويبة انا عاد دايرة اسوي شنو ؟ربنا قسم لنا كدي ..
قعدو يتغدو الاربعة في كل رضاء بهذا الطعام البسيط المتواضع ..
وبياكلو بكل شهية زي التقول قدامن اصناف من اللذايذ والمطايب ..
بعد المغرب ابوهم جاء .. وشايل معاهو كيس فيهو لبن وعيش . ومن برة ينضم .. ياثويبة يا احمد

يوسف اوعا تكونو نمتو الليلة عندي ليكم قصة رهيبة ..
يوسف جا جاري وقف قدامو . وقال ليهو انا صاحي اها عاين لي ..
ثويبة قالت ليهو كدي اخد راحتك ..شوية نعمل ليك كباية شاي ..وانا عايزة ابشرك ..
قال ليها شغلوووووك ؟؟
قالت ليهو اييييييييوااااااا .. بس في كلام سري كدا لازم احكيهو ليك .. قال ليها خلاص انا بشرب الشاي بيغادي ..تعالي لي ..
احمد قال ليها انا اجي؟ قالت ليهو كان جيت مافي قصة .. قال ليها خلاص بستنى ..
بعد عملت الشاي ..وشالتو جوة لابوها ..قعدت تحكي ليهو في الحصل في الشركة من الاول .. لغاية ما رجعت البيت ..
وقالت ليهو هسي انا دايره اخد رايك في الموضوع ده ..
قال ليها .. قبل ماتشتغلي لازم تقابلي الزول ده ..وتسأليهو سؤالين ..وهو مسؤول انو يجاوبك ..
تقولي ليهو انت قبلتني من دون البنات ليه..؟
والسؤال التاني .. انت ليه قلت انا قريبتك رغم اني مابعرفك .. نحن يابتي مبدأنا ضد الناس البشغلو اقرباهم ..مع عدم الكفاءة والخبرة .. وضد الوساطات .. الواسطات الخربت البلد .. وخلت كل مجال في بلدنا غير مشرف ..
انا ماعايزك تشتغلي معاهم الا يديك سبب منطقي يخليك انتي مقتنعة بانك تشتغلي وانتي ضميرك مرتاح ..
ولو شغلك عشان شكلك لازم ترفضي الشغل بي رمتو .. وربنا ماشق حنكا" ضيعو ..
ولو حسيتي الود عندو نيه غير سوية . تنسحبي بكل هدوء وبدون اي فوضى ..
وزي ما وصيتك أساليهو بي ادب وبكل طيبة خاطر ..
وماتنفعلي كلو كلو مهما كانت الاسباب والدوافع ..
قالت ليهو انت يا ابوي المفروض تشتغل موجه تربوي .. لالا اقول ليك المفروض تكون وزير التربية والتعليم .. لالا رئيس الجهورية .. قعد يضحك قال ليها كدا كترتي المحلبية ..
ضحكو الاتنين كدا .. وقال ليها قومي قومي سريع نمشي نلحق الجماعة قبل ماينومو نحكي ليهم القصة ..
قالت ليهو يلا أرح اذان العشاء باقي ليهو نص ساعة .. خليهم يتعشو انت امشي صلي وتعال احكيها لينا بعد العشا ..
اها طلعو ليهم قال يا اولاد صلو واتعشو القصة بعد العشاء ..
صلى وجاهم لقاهم اتعشو قال ليهم .. تعالو احكي ليكم القصة دي ..
القصة دي حصلت في حتة اسمها الرهد .. بقول ليهو الرهد ابو دكنه مسكين ماسكنه .. كان في ولد اسمو يعقوب واحد عند امو وابوهو ..عمرو 15 سنة وابوهو اعمى .. وابوهو معلمو الصدق والامانة
.. وهو قاعد يمشي السوق يبع الاكياس الفاضية .. يوم من الايام كان في تاجر شايل قروش كتيرة في عربيتو بالملايين ..
قام التاجر باللخمة نسى القروش في العربية .. ونسى القزاز الورا فاتح .. ومشى
وويعقوب بالصدفة مرا جمب العربية لقى القروش ربط ربط في العربية والقزاز فاتح وعرف انو سيدها نساها .. يعقوب قال انا لازم احرس العربية لغاية ماسيدها يجي .. عشان مايجي حـرامي يسرق
القروش دي ..سيدها مابكون لماها بالساهل ..
وفعلا جاء حرامي حاول يسرق القروش .. ويعقوب صارعو ومنعو لغاية ما التاجر جا وعرف الحاصل .. وسال يعقوب قال ليهو انت شغال شنو ؟ قاليهو انا ببيع الاكياس الفاضية .. قال ليهو وابوك شغال
شنو؟ قال ليهو ابوي اعمى قاعد في البيت ..
قال ليهو الله اداك اصلا القروش ديل زكاة موديها لناس مساكين ولقيتهم رحلو .. شيل القروش دي حقتك .. يعقوب شال القروش ومشى عالج ابوهو واشتري دكان وعاشو في امن وامان ..
عشان كدا قالو الزول البمشي صاح ربنا بقيف معاهو يلا قومو نومو تصبحو على خير ..
ثويبة اتاثرت للقصة لمن قشت دميعاتها ..
واحمد قال لابوهو يا ابوي ممكن نمشي يوم زيارة لي يعقوب عشان انا عايزو يبقى صاحبي ..
قال ليهو يا احمد ياولدي بلدنا مليانة يعقوبات .. قوم على النوم عشان المدرسة بكرة ..
ولو ملاحظين ثويبة ماحكت الحلمة لابوها لانو امها قالت ليها الحلم الكعب الزول مايحكيهو ..
وباكر طبعا ناوية تعمل عمايل في الشركة .. وتوريهم الطفا النور منو ..
وليمتين الواطة تصبح عشان تمشي وكلنا شوق لما يحصل مع الود عامر

الحلقة 4
بقلم طارق اللبيب ..
صباحات الله بي خيرا .. وكل يوم يهل للناس معاهو اقدار جديدة .. بيت ناس عمك بشرى بصحو بالبسمة والفرحة المنزوعة من قساوة الزمن .. كانهم عايشين في كوكب تاني .. خارج نطاق البلد الصاري وشو .. مع انو ملان بالخير .. ودافق بالنعم .. فيهو بيوت تكب بالنعمة .فيهو بيوت منورة بالفرح مبنية .. فيها سعادة فيها الفرحة فيها الالفة .. فيها الكل يحب الكل ..
وفيها ولاء وفيها وفاء وفيها الطيبة والتحنان ..
كلها دقايق واي زول من ناس البيت مشى على وجهتو.. الا زينب القعدت تدير شؤون وزارة الداخليه طبعا ..وتجهز وتنضف وتغسل زيها وزي كل رموز الخير في بلد الخير التحية لكل ام ..
نحن نمشي مع زهرة ربيع الدنيا .. عنوان الصلاح والطيبة .. ثويبة ..
ركبت المواصلات الصباح وماشافت الراكبين كم . والكراسي الفاضية والنزل منو والركب منو ..
لانها بي طبيعتها معاينتها للارض اكتر من التلفت وقوة العين ..
كل مرة تدي التفاتة بي شباك الحافلة ..عشان تشوف وصلت ولالا ..
خاتة شنطتها فوق حكرها ..ومشغولة باظافرها بتعمل في شنو مامعروفة.. وكل مرة تجر اكمام العباية ..عشان تغطى ظهور كفيها ..
والعباية طبعا ظاهر عليها مهرية من الغسيل والمكوه ..
اي زول يشوف ثويبة ممكن يعرف حال اسرتها المادي ..حتى الجزمة اللابساها مخيطة من تحت بي خيط نقالة .. وارضيتها مسهوكة .. سبحانك ربي ..
بس وصلت الشركة ودخلت .. ولافي زول القى ليها بالو .. مشت طوالي لمكتب التوظيف ..
لقت العم الكان اتكلم معاها امس ..
قالت ليهو السلام عليكم ..
قال ليها عليكم السلام .. انا ماقلت ليك البسي لبس زي الناس ؟
قالت ليهو والله ياهو لبسي البقدر عليهو ياعمي ..
قال ليها يابت انا ماعمك..
انا عبدالقادر .. قالت ليهو خير ياعبد القادر ..
اها انا جيت استلم الشغل .. قال ليها طيب انتظري يجي قرشي ..يفهمك الوتيرة ..
قالت ليهو الله يديك العافية خلاص انا منتظرة ..
ممكن سؤال تاني؟ قال ليها اتفضلي.. واختصري لاني انا مشغول ..
عاينت ليهو كدا .. لقتو شايل كباية شاي سادة وما قدامو اي شغل ..
قالت ليهو انا بسأل من عامر ماجاء؟
قال ليها .. متين هو؟ .. خلاص بدينا ؟ ..اخدي ليك يومين حتى تبدي الدرامات دي ..
ولا مفلسة شديد؟
هنا حست بانو دواخلها بدت تغلي ..
ردت بكل هدوء .. قالت ليهو لالا ماكدي بس موضوع تاني ..
قال ليها بجي زي الساعة 12 كدا امشي استلمي الشغل وانتظريهو ..
المهم مشت على مكتب الحسابات . وانتظرت زي ربع ساعة كدا جاها قرشي .. وسلم عليها ..
شاب شكلو جادي ..وهادي جدا ..والظاهر عليهو الخجل والحياء.. والحذر ..
وبتعامل بكل دقة .. وبتكلم بي احترام ..
حتى ما ملا عينو فيها .. قالت ليهو انت قرشي ؟ قال ليها نعم حبابك ..
قالت ليهو موصيني ليك عبد القادر ..قالي تفهمني طريقة الشغل ..
قال ليها حاضر انتي منو لو سمحتي .؟ قالت ليهو انا ثويبة البشرى ..
قال ليها المسألة ساهلة جدا وبدا معاها ..وهي طبعا تعجبك في سرعة الاستيعاب ..
عرفت اي حاجة وكل الملفات واماكنها وحسابات العملاء وعييييييييك..
المهم لمن جات الساعة واحدة هي كانت سلكت تب ..
وعامر لسع ماجا ء.
في نهاية الدوام تقريبا بي ربع ساعة وصل عامر ود العز ..
لبس مختلف والوان مختلفة وجزمة مختلفة .. وحال مجيهة طبعا ..
المهم .. هي من جوة المكتب شافتو بتكلم مع واحد برة ..طلهت وقفت في باب مكتبها ونادتو ..
السلام عليكم عامر لو سمحت بعد تخلص عايزاك ضروري ..
الود انهى كلامو سريع وجاها ..
وكان مافي اي زول غيرهم الاتنين .. بس باب المكتب فاتح .. والناس ماشة وجاية ..
قالت ليهو انا ممنونة جدا لتوصيتك علي ..انو يشغلوني.. لاني بالجد كنت محتاجة للوظيفة دي ..
لكن في سؤالين كدا شاغلني شديد .. ياريت القى عليهم الاجابة ..
قال ليها اتفضلي .. هو كان قاعد في كنبة انيقة كدا قدامها وخالف رجل على رجل ..
وهي قاعدة في كرسيها قدامها تربيزتها وماخاتة يديها في الطربيزة ..
قالت ليهو انت ليه اخترتني من دون البنات التانيات ..
ده السؤال الاول .. جاوبني حتى اقول ليك السؤال التاني ..
قال ليها طيب انا اقول ليك .. اولا .. البنات الاتنين ديك من شكل لباسهم انهم مامحتاجين للشغل ..
والحاجات العاملنها في وشوشهم كانهم جايين لعرض ازياء ..
بعدين انتي ماشفتي نظراتهم كلها عدم حياء.. واي زول مابخاف من الله انا ماممكن استأمنه على الشغل.. زيادة على ذلك شهاداتك كلها جداراتها مؤهلة اكتر منهم ..
قالت ليهو طيب ليه تقول انت قريبي .. وانا اول مرة اشوفك ..؟
قال ليها حتى لو قلتا اختي مالو؟ .. مش بقولو رب اخ لك لم تلده امك؟ .. انا حسيت بانك مننا .. والارتباط الروحي اهم من الارتباط بالدم ..
هسي في اخوان والعداوة قايمة بينهم ..
وفي ناس مابينهم اي علاقة رحمية وعلاقتهم الروحية اقرب من الاخوان..
انتي لو رافضة المبدأ ده انا ممكن امشي واقول ليهم انا كلامي امس ماصح والبت دي مابيني وبينها اي معرفة ..
قالت ليهو لالا.. خلاص.. بس انا كانت عندي هواجس ..وهسي بي كلامك ده طردتها تمام ..ربنا يكرمك واسفة على الازعاج ..
وفرحت فرح عجيب.. ولمتين تصل البيت .. عشان تبشر امها وابوها بالشغل الحايصلح ليهم الاوضاع ان شاء الله ..
رتبت كل الملفات..ونضفت المكتب قبل ماتطلع.. وشالت السبت بتاع المهملات.. وطلعتو بره العمارة في كيس النفايات .. وجات راجعة عاينت للمكتب كلو من جيهاتو الاربعة وقفلت وطلعت ..
كان غالبية الموظفين مشو .. بس لسهة في ناس ..
نزلت بالسلم وهي طالعة كدا لاقت عامر بتكلم في التلفون .. برة الشركة من الناحية الشرقية ..واقف في ضل العمارة .. وبتكلم ..لمن شافها انهى المكالمة ..
وقاليها سلام ثويبة.. انتي ماشة وين ؟
قالت ليهو الثورة ان شاء الله ..
قال ليها انا ماشي على امدرمان ممكن اوصلك في طريقي ؟؟
قالت ليهو لا والله ماينفع .. انا عندي برنامج مابنفع الا في المواصلات ..
قالت ليهو كدا وهي ماشة ..
اها يازول البنية ماشة في كل امن وطمأنية وركبت وصلت البيت ..
ماشة في شارع البيت كدا .. البيت واقع رابع بيت من الناصية الشمالية .. وفاتح جنوب .. في شارع ..
شافت من بعيد في لمة قدام البيت .. وكانت مفتكرة اللمة دي في بيت الجيران ..
وكل مرة بتكضب في عيونها .. وشوية شوية شافت ناس مارقة وناس داخلة من بيتهم ..ده بيتنا اي ..
وقلبها دة بقى يضرب.. لمن حست بيهو داير يمرق بي حلقها ..ياربي في شنو؟
الناس الملمومين قدام بيتنا ديل شنو؟ ... يالطيف مايكون حصل لينا حاجة ..
ياربي امي مايكون حصل ليها حاجة ونحن مافي . .. اساسا ابوي مافي ..
اول زول لاقاها في الشارع سألته .. والبيت كلو المسافه الباقية قدامها مية متر ..
واحد شاب كدا من ناس الحلة ..قالت ليهو الحصل شنو؟ اللمة دي شنو؟

الحلقة 5
بقلم طارق اللبيب ..
ثويبة لمن سالت الود .. الحاصل شنو؟ ..وكانت عايزة تقول ليهو.. قول (مافي شي) ..قول (مافي شي) .. لكن الود فتحة خشمو ..قال ليها انتي كنتي وين .؟
اخوك احمد ضربتو عربية .. قالت ليهو حصل ليهو حاجة .؟.. قال ليها انتي تراك وصلتي ..خشي براك اسالي .. ماسامعة صوت البكاء؟..
وفعلا في صوت بكا .. لكن ما كتير ..
ثويبة حست بانو كرعيها ماشايلنها.. اتذكرت الحلمة الحكاها ليها احمد ..قال ليها كل يوم التمساح بسكني ..ومابحصلني ..لكن اخر مرة قرم لي يدي اليمين ..
قبل ماتصل الباب اتاكدت بما لايدع مجالا للشك .. انو اخوها احمد الكبير مات ..
اول ما جات داخلة.. الحريم كبسن فيها.. ويبكن بكا حار شديد ..وهي بس ساكتة ومبهوتة.. وتعاين بعيونها.. اتكلت علي الحيطة ..وقعدت وضهرها ملامس الحيطة.. واندجت في الواطة.. لامن جير الحيطة اتحك في العباية .. وريقها ناشف .. لدرجة انو خشمها مغبش ..زي الزول الشفط ليهو بنزين ..
والنسوان يقولن ليها يابت ابكي ..كدا بتمرضي .. بس قالت ليهن امي وينا؟ ..ابوي وينو .؟
احمد اخوي الحصل ليهو شنو؟ ..
واحدي من الحريم قالت ليها .. الحي الله والدايم الله يابتي.. خليك مؤمنه .. ابوك جوة مع الجنازة ..
قالت ليها يعني احمد اخوي بقى جنازة.؟. خلاص؟.. تاني مافي احمد ..؟
المراة قالت ليها خشي جوة.. شوفي امك حالتها كيف؟ ..
طبعا" البيت اساسا فيهو غرفتين فقط ..غرفة حقتها هي واخوانها ..وغرفة للوالدين ،،
والاتنين فاتحات في برندة مسقوفة بي زنك ..
واحدة من الغرف مقفولة هسي .. وشكلهم بجهزو في الجثمان جوة ،،
والغرفة التانية فيها امها .. معاها حريم بصبرن فيها ..وبقرن ليها في قران وممسكنها المصحف والسبحة
وثويبة قامت داخلة من الحوش علي البرندة .. ابوها جا طالع ..قال ليها ثويبة؟؟ جيتي ؟؟ .. ماشاء الله عليك .. ايوة كدا .. دي بتي الحقيقية .. البتصبر على الامتحانات .. نحن ماعايزين ربنا يشوفنا ونحن ماراضين بحكمه
.. امشي خشي جوة صبري امك يابتي .. وهي بتعاين لابوها في وشو.. وماقادرة تنطق كلمة ..
وجواها بتقول .. حت لو سترت قوة قلبك .. كل الحزن الكامن فيك..
انا حاسابك .. وقلبي المشقوق نصين .. عارف البيكا وحاسي بيك ..
ومرة قال اللبيب ..
اضرب هم فؤاداك بالفــرح باكريه.
واتلقا المصايب فنجره وسخريه.
جفف دمعة الروح بي نعم محريه..
قلب الراسي سنداله ودموعو ضريه.
..
مالك يارفيق بالجرسـه مارق حسك.
صدرك ليه بضيق وكت المصيبه تجسك.
كان داير الكوارث والمحــن ماتمسك.
شوفلك فجه غير كون الله كان بتدسك..
...
كلما يغتسك هَم بي سيولو السالو.
حقك تبقى صنديد كالجبل تقسـالو .
طبع الراسـي والحــر والعنيد وامثالو.
مابنخجّـا بي البكا والحـــريم ترثالو.
.
عيونو حمر شديد .. شكلو لمن كان جوة مع الجثمان زرف دموع عزيرة . ابوها فات ..خلاها واقفة زي الصنم متسمره في نص البرنده .وماقادرة تتحرك .. في مراة قالت البت دي ماطبيعية ..زول يرشها بموية .. اعملو حاجة خلوها تبكي .. وهي واقفة ومتردده تدخل على امها .. وماعايزة تشوفها كلو كلو
.. ليه ماعارفة .. بس واقفة في نص البرندة منططه عيونا وماقادرة تستوعب الحاصل ..
ابوها طلع بره وبسال من الجماعة المفروض يجهزو القبر .. مشو ؟
في واحد رفع معاهو الفاتحة وقال ليهو الحصل شنو يا بشرى؟..
قال ليهو .. والله .. زي الساعة عشرة صباحا كدا والطلبة طالعين للفطور .. احمد قطع الشارع يشرب موية من السبيل غرب الشارع .. المدرسة بتاعتهم مافيها الا زير واحد وكوز واحد .. والطلبة بشربو بالدور لامن الحصة تفوتهم . زي ماعارف احوال المدارس الحكومية ..
احمد ولدي قاطع الشارع . جات حافله قالو ماشه باخر سرعة .. احمد لامن شافها مسرعة عليهو اتردد وضربتو ..نقلوهو المستشفى ..وضربو لي انا حصلتهم ..وانت عارف المستشفيات والحاصل فيها .. من هنا لاهنا غايتو وحبة جهجه دكاترة تعلمجية .. وقلة في ادوات الاسعاف ولدي مات والحمد لله ..
والماتو قدامو كتار ..والبموتو لسع كتار .. ربنا يكون في العون ..
ونحن ماعندنا غير نقول ..الخير فيما يختاره الله .. الله يسامحنا ويوفقنا نرضى باقداره ..
اها ياناس .. الجماعة المشو المقابر ديل ما منهم خبر؟..؟
واحد قاليهو جاهزين يا عم بشرى .. قال ليهو خلاص نطلع ..
طوالي دخل ومعاهو جماعة الكلام ده العصرية 4 وشوية .. وشالو الجثمان..
وطلع احمد اخر خروج ليهو من البيت .. وثويبة ما زالت واقفة في نص البرندة ..
ولمن طلع الجثمان .. وعاينت لاخوها ممدد في العنقريب .. ومكفن بالابيض ..
وكان في بقع دم ظاهرة على بياض الكفن ..
ثويبة كانت ممبهوتة بهتة غريبة .. وزي المامركزه .. وبتتمايل كدا زي العايز تقع ..
بس عيونها جاحظة وماشايلة حبة دمعة ..
ولمن الناس طلعو .. واتكلت على الحيظة وبرضو المرة دي قعدت جوة البرندة ..
وفجأة دموعها ديل كبن زي الينابيع ..وختت يدها فوق خشمها ..
واتكلت على يدها كدا عشان ماتقع ..
وقالت كلمة براحة كدا قالت ..(ودعتك الله ياستر البيت وباب الحوش .. الى حنات الخلد باذن الله )..
احمد 13 سنة بقرا في تامن ممتحن .. السنة دي للعالي ..وكانت ثويبه اكتر زول قريبة منو.. وبتذاكر معاهو ..وبتحبو محبة عجيبة ..
وبتحن عليهو .. كان طيوبي .. ويوسف الاصغر منو 10 سنوات شوية شقي ..
بس احمد كان عندو نفس حنية ثويبة وطيبة ابوهو ..
في بت من صاحبات ثويبة متدينة كدا جات داخلة .. وبقت تتكلم مع الحريم .. ياحريم ماتبكن احمد اساسا من طيور الجنة لانو مامكلف .. الكلام كلامنا نحن ..الماعارفين مصيرنا شنو؟ ..قالت لثويبة ثويبة حبيبتي قولي انا لله وانا اليه راجعون ..
ربنا بثبت قلبي .. وقومي من قعدتك دي .. وارضي بحكم الله خلي ربنا يرضى عنك..
ثويبة قالت انا لله وانا اليه راجعون ..
وفعلا حست بالثبات بس قلبها مقطووووووووووع ..
واتشجعت ودخلت لامها وحضنتها وساكتين بس الكلام فقط للدموع ..وقعدت جمبها والام ماسكة السبحة وبتهمهم بتقول في الاذكار والتثبيت ..
الحمد لله غايتو الام صبرت صبر غير متوقع ..
بل بتتكلم مع بتها .. ثويبة يابتي كل زول مصيرو الزوال وكلنا ماشين ..
انا عارفة ريدتك لاخوك .. وعارفه قلبك الاتحرق عليهو ..لكن يابتي النبي الحبيب تحت التراب ..
نحن ماعندنا غير نقول رضينا بامر الله ..
ثويبة كلام امها وكلام صاحبتها نزل عليها بعض السكينة بس المصاب كان جلل ..
والفاجعة فوق الاحتمال ..
قامت اتوضت وصلت العصر في الزقاق البي ورا الاوضة ..
ودعت كتير وبكت في الدعا .. وكانت بتقول ياربي تصبر ابوي وامي ..
ياربي تصبرني .. ياربي احمداخوي بحبو اكتر من روحي ..ياربي من هنا وعلى الجنة..
وجوار المصطفى ..
اها ناس الدفن رجعو .. والبشري خاتي الكراسي برة وبستقبل في التعازي ..من المعارف والجيران .. وناس الطرمبة واقفين معاهو وقفة الرجال .. حتى الخضر صاحب المحطة .. والناس ديل حبة حبة بقو يتفرقو ..
لامن جا الليل .. البيت جوة فضى من حريم البكا ..
والبشرى .. بعد العشاء شال العشاء للناس البرة .. والجيران جابو عشاهم ..
وفضلة خيركم اتعشو كلهم ومشو ..
والبشرى سريع جاء داخل وقال وينو يوسف .. يوسف 10 سنوات ماقادر يستوعب حجم الموضوع .. وقال لابوهو يا ابوي احمد دفنتوهو ؟؟ ..قال ليهو ايوة نعم وخلاص مشى الجنة ..
قال ليهو طيب في العيد مابجينا تاني ؟؟.. قال ليهو زول يعيد في الجنة يجينا هنا يعمل شنو؟ حظو موش؟
المهم البشرى كان بالجد مشكاة ..ومصباح يتوهج بالايمان في العتمة الغريبة دي..
وثويبة خلت ابوها بتكلم مع يوسف ودخلت الغرفة بتاعة الاولاد .. وفتحت الدولاب طلعت هدوم احمد الوسخانة الكان قلعها الصباح وهو طالع على المدرسة .
ولمتها كدا على صدرها وبقت تشم فيها وتنتحب في الخفاء وكبت دموع بللت الملابس .لا اله الا الله .. ابو ها جاء داخل لقاها منكفية على السرير وحاضنة هدوم اخوها ..
برضو ماقدر يتمالك روحو ..ذرف الدموع ..بس قش دموعو سريع ..وشال منها الهدوم وساقا برة ..
(صنديد يا اب قلب يا مقنع الكاشفات ..
ويادقر الهشـــابه البردع النايبات ..)
قال ليها تعالي ياثويبة انا عايزك ..
واحمد راح وناس البيت بقو اربعة بدل خمسة ..
مازالت الامتحانات تتوالى على هولاء الناس ..
البشرى ساق بتو برة .. وجا قعد في نفس السرير القاعده فيهو زينب وقعــّد جنبو ثويبة ويوسف وبقو
قاعدين الاربعة في سرير واحد . ولماهم عليهو كدا فارد يديهو فوقهم كلهم بي امهم ..
وعايز يتكلم وقفت ليهو حاجة في حلقو وقطع الكلام ..
وسكت مسافة ..
وقام .. قعد في السرير التاني وقال ليهم خليكم قاعدين في قعدتكم دي انا عايز احكي ليكم قصة حصلت
قدامي وانا شفتها وقولو لي رايكم فيها ..
وبدا يحكي ..

الحلقة 6
بقلم طارق اللبيب ..
مسافة ..
الليلة كانت الحلقة طويلة قسمتها على اتنين ..
عم البشرى بدا يحكي في قصة .. وعلى غير عادتو كانت حكايتو مقطعة ..
بعد كل خمس كلمات يسكت .. ويتنحنح ..
قال ليهم طبعا قبل ما احكي ليكم الحكاية الحصلت قدامي .. في سورة في القران اسمها سورة الكهف ..
يوسف قال ليهو دي الفيها الناس الناس النامو .. بقروها يوم الجمعة .. قال ليهو صح يا شاطر انت ..
قال ليهم سورة الكهف دي .. ربنا حكى فيها حكاية .. انو كان في راجل ومراتو صالحين .. وناس بعرفو ربنا .. وعندهم ولد واحد وبحبوهو شديد .. كان بلعب فب الشارع .. جو نفرين.. واحد الخضر
والتاني موسى كليم الله .. قام الخضر مسك الولد كتلو.. موسى قال ليهو حرام عليك ياخي.. كيف تقتل ليك رقبه .. قال ليهو انا ماعملت كدا بقرار مني براي .. انا مامور من ربنا .. قال لي اقتلو .. بعدين
بحكي ليك كتلتو ليه ..
والولد صغير ومستحيل يكون عمل جريمة .. ياربي السبب شنو ؟؟ يلا في النهاية الخضر جا يكلم موسى.. يوريهو السبب القتل بيهو الولد .. قال ليهو عارف ياموسى .. الولد ده امو وابوهو مؤمنين وناس صالحين شديد ..لكن ربنا في علم الغيب .. عالم انو الولد ده لامن يكبر .. ببقى كافر ويكون زول مفسد في الارض .. ويغضب ربنا .. موش كدا وبس.. كمان بيجبر امه وابوهو على الكفر ..
اها ياموسى احسن يموت ولا احسن يحيا ؟.. موسى قال ليهو .. والله الحمد لله المات .. سبحان الله ربنا بيعلم الغيب .. ودايما بيختار لينا الخير .. حتى الموت مرات يكون فيهو لينا مصلحة .. بس نحن كيف نثق في ربنا ..
يلا احكي ليكم القصة التانية الحصلت قدامي .. زمان كان عندنا صديق عزيز .. وانا بعرفو ومشيت لبيتو كتير .. الزول ده عندو بت واحدة .. عمرها 7سنوات .. جميلة جمال عجيب .. وظريفة ونضامة
.. والحلة كلها بتحبها .. لمن تلاقيك في الشارع انت يومك كلو بتكون مبسوط ..
البت دي انا بعرفها .. وكانت بتحبني جدا .. ومما اجي البيت بتقعد تغنى .. عمي البشرى جا .. عمي
البشرى جا .. .. اها يوم البت دي جاتها حمى .. ابوها وداها الدكتور عمل ليها كل الفحوصات.. ماعرف عندها شنو؟
والحمى تهرس فوها تلاتة يوم .. ومساهرين معاها تاس الحلة كلهم ..
وانا زاتي كنت من الناس القاعدين .. البت دي تقنت زي الزول الكبير .. من شدة الالم والسخانة ..
في اليوم الرابع من الصباح زي الساعة 6 صباحا البت سكتت من القنتي ..
ابوها عاين ليها كدا لقاها ما بنتتنفس .. هبش قلبها لقا قلبها وقف .. .جرينا بيها للدكتور.. الدكتور قال ماتت .. ابوها ده اتجرس جراسة .. وقعد يدردق في الواطة .. والحلة كلها بقت تجعر وتسكلب على
البنية ..
والله انا براي قلبي انقطع عليها لكن انا كنت منستر لانو ده قدر بنا ماصح الزول يعترض على ربو الخلقو ولاشنو؟
وقعدنا معاهو وشاطرناهو الاحزان لغاية المساء ومشينا جيناهو الصباح لقيناهو فرحان ويتبسم استغربنا كلنا .. قال لي يابشرى تعال احكي ليكم الحصل ..قلت ليهو احكي ..
قال لي انا بعد ما مشيتو مني امبارح كنت حزين شديد .. وبقول ليه ياربنا عملت فيني كدا؟ .. البت صغيرة .. مالك شايلا مني؟ .. لامن نمت وانا بتكلم فارغ ..
في النوم حلمت بي بتي حية وعايشة كويس .. وكبرت وبقت عمرها عشرين سنة ..
بس بقت تافهة وحقيرة .. ومابتصلي وبتتكلم زي كلام الكفار والخواجات .. ويوم من الايام عاينت ليها.. لقيت بطنها منفوخة سالت امها امها قالت البت حامل بالسفاح ..
طوالي شلت السكين وكتلتها ..
ووبعد داك نويت اقتل نفسي عشان اتحاشى الاهانة والعيب ..
بس انا خلاص قربت انتحر ظهر لي رجل قال لي لالا ده كلو ماحصل انت في حلم بس المفروض تثق في احكام ربنا لانو ربنا لطف بيك واخد بتك وهي صغيرة ودخلت الجنة ..
شفتو يا جماعة ..القصة دي انا شاهد عليها ..
عشان كدا يا ثويبة ويازنوبة .. ويا يوسف نحن المفروض نفرح لي احمد انو مشى لربنا وربنا حيكرمو اكتر مننا ..
واكيد ربنا حيكون عمل كدا لحكمة بالغة نحن ماعارفنها ..
سبحان الله القصتين ديل .. عملن عمايل السحر في نفوس ناس البيت ..
وثويبة قالت لابوها الله يكرمك يا ابوي .. والله قلبي زي الختو فوقو حجر من الثبات ..
والله انا بس مافضل في قلبي الا حريق الشوق لشوفة اخوي .. لكن متاكدة انو في نعمة مع ربو ..
بس ماعارفة اقدر اعيش حياتي من دونو كيف؟
غايتو الحمد لله .. لكن بحقصتك دي كدا اتاكدنا .. الخير ليهو ولينا انو يمشي ..
لكن يابابوي في حاجة غريبة .. عارف شنو؟
احمد مولود يوم 6شهر 6 سنة 96 .. واتوفى يوم6شهر 6 سنة 2009 ..
تفكر الحكاية دي شنو؟ مصادفة ولاعندها سر .؟.. قال ليها نقول الله اعلم يابتي ..
البشرى قال يلا انتو كلكم صليتو قالو ليهو ربنا يقبل قال يلا على النوم ..
ومشو على النوم حاج البشرى رقد في سريرو وبعاين للنجرم والدموع دي تنزل من عيونو لانم تدخل في اضنيهو الليل كلو عينو مالاقت لغاية أذان الفجر ..
وقام الصباح عادي زي الكان نايم ويتبسم .. والبت نفس الشي وامها لكن قامو الصباح بتونسو وبتبسمو مع بعض زي عادتهم ..
بس فاقدين حركة احمد وجمال وشو الكان بكسي الصباح بهجة ورونق خاص ..
احمد البسمتو مافي شي بشبها في الدنيا .. احمد الكان اجمل زول في البيت .. وعندو سحر فوق وشو تبارك الخالق .. بس هسي اي زول من ناس البيت بخفي الامو عشان مايحسس الاخرين ..
وكلهم محروقين من جوة والعبرة حامياهم يبلعو ريقهم .. ولاقادرين يدلو جغمة من الشاي ..
ثويبة دخلت تلبس يوسف للمدرسة .. وبتوصي فيهو .. اوعك تقطع الزلط .. اوعك تطلع من المدرسة .. انا يهدي كبيت ليك الموية في الزمزمية دي.. ومليتا ليك لو عطشت اشرب منها .. ماتطلع الشارع ..
وجهزتو وطلعت . وزينب دخلت تدخل عدة الشاي وثويبة طلعت مع يوسف من الاوضة لابسين وجاهزين للمرقة .. البشرى قال لي ثويبة اها ياثويبة الشغل اول يوم كان كيف .. قالت ليهو والله يا ابوي كويس ..
وطبعا سالت الزول الزول السؤالين .. وبتتكلم معاهو براحة عشان امها ماتسمع .. قال ليها اها اكتشفتي
شنو؟ قالت ليهو الزول طلع كويس شديد وماعندو نية كعبة وشغلني عشان مؤهلاتي .. العلمية ..
قال ليها طيب الحمد لله كدا تطمئني وتكسبي حلال ..
عارفة البشغلوها عشان جمالها ماعندها فرق بينها وبين الرقاصة والبتكسب عيشها من بيع نفسها للرجال .. عشان كدا بتلقيهم اليوم كلو مشغولين بي الصنفرة والحكحيك والبودرة ..لانها دي عدة الشغل
الاساسية ..
اتبسمت كدا وقالت ليهو غايتو يا ابوي مافايتة عليك حاجة ..
وهم طالعين كدا في جماعة شكلهم جو للتعزية .. عربية وقفت برة .. لمن طلع البشرى واولادو وهم
جاهزين لقو ديل ناس عامر ..

الحلقة 7
بقلم طارق اللبيب ..
..............
يادوب الساعة 7ونص ياربي عامر ده الاداهو خبر منو؟
وكيف عرف انو اخوي اتوفى وكيف عرف بيتنا ..
قالت ليهو يا ابوي ده عامر ولد صاحب الشركة الانا شغالة فيها والمدير التنفيذي ..
عمك البشرى استقبل منوالتعازي .. وباشره باحسن مباشرة . ومعاهو اتنين راكبين في العربية .. العربية حاجة كدا اسمها ليكزس ..
عاين لي ثويبة كدا وقال ليها البركة فيكم يا ثويبة .. دخلهم البيت جوة . وقعدو في كراسي في البرندة
وقال ليهم اشربو الشاي ..
عامر حلف وقال ليهو والله نحن ماقاعدين وانتو ذاتو شكلكم طالعين ..
وانا وراي شغل كتير .. انتي ياثويبة ماشة وين ؟
الليلة برضو ماشة الشغل قالت ليهو طبعا" .. قال ليها انتو ناس عجيبين .. شكلكم زي الماعندكم وفاة
؟قالت ليهو عاد نسوي شنو يعني مهما عملنا الرحل .حيرجع لينا ؟؟ الحمد لله على كل حال .. لازم
الحياة تمشي والناس تنسى ..
غايتو المهم جابو ليهم موية سادة شربوها
وثويبة قالت لابوها . خلاص يا ابوي انا بطلع عشان اوصل يوسف المدرسة اول حتن امشي الشركة
..عامر قال ليها طيب انتظري اوصلكم معاي قالت ليهو لالا اخد راحتك اصلا المدرسة في طريقي ..
وطلعت .. طبعا ما اصرا عليها .. ابدا" .. وبدا يسأل في في عم البشرى عن الحادث ..
وقال ليهو بتاع الحافلة وين ؟ قال ليهو والله الحكاية دي متابعنها ناس الحركة وانا لسه ماعندي خبر بالحاصل ..
قال ليهو طيب القصة دي فيها دية انتي ماخد بالك؟ ولا ماجايب خبر ؟
قال ليهو والله مافكرت في الموضوع ده ولا طرأ على بالي ..
قال ليهو طيب السواق بكون محبوس في الحراصة ومابطلع الا تجي انت او ضمانة من شركة التأمين
لازم انت تمشي المركز تشوف الحاصل ..
قال ليهو ان شاء الله .. مافي اي عوجة ..
وفعلا بعد ما طلعو عم البشرى اتحرك على مكتب الحركة .. ولقى الود محبوس .. ولد شاب .. وشكلو
خايف خوف شديد وناس شركة التامين ماجوهو ..
ساله قال ليهو ليه انت لسع ماطلعت.. قال ليهو انت منو؟
قال ليهو بس انت جاوبني خلي انا منو دي ..
قال ليهو ..
والله ماطلعت ولاشكلي حأطلع .. انت شكلك من اهل الولد الطالب صح ؟.
قاليهو ايوة انا من اهل الولد .. ماطلعت ليه انت ؟؟
قال ليهو .. لاني في مشكلة ..
والناس القاعدين برة ديل اهلي .. وناس الحركة ماعايزين يتفاهمو معاهم ..
قال ليهو المشكلة شنو؟
قال ليهو انا سايق العربية من واحد صاحبي .. وهو السواق الاساسي .. مشى رحلة مع اصحابو جبل اوليا ..
واداني العربية امسكها ليهو يوم امس ده ..
وانا كنت محتاج للقريشات ومالاقي شغل .. لانو عندي اخواني صغار بربي فيهم ..
قال ليهو والعربية حقت منو اساسا"؟
.. قاليهو العربية حقة مراة ارملة ساكنة في بحري .. وعايشة منها وليداتها ..
قال ليهو طيب وين مندوب شركة التامين ..؟؟
قال ليهو المشكلة انو الترخيص منتهي ليهو اربعة يوم ..
وبالتالي شهادة التامين بتكون انتهت يعني الشركة ما حتقدر تعمل لي اي حاجة ..
بس نحن عندنا تصرف ..
قال ليهو شنو التصرف .. قال ليهو بكري السواق الاصلي . مشى لصاحبو في الشركة يعمل ليهو شهادة بأثر رجعي .. قال ليهو اثر رجعي يعني شنو؟
قاليهو بتاريخ قبل الحادث .. عمك البشرى قال ليهو .. طيب كدا موش حرام القصة دي ؟
قال ليهو طيب نعمل شنو؟ نحن مضطرين .. ولا انا ولابكري ولا اصحاب العربية عندنا مبلغ الدية لي اهل الولد ..
عمك البشرى قال ليهو انا ابو الولد .. وماعايز منكم دية ولاغيرو ..
وحامشي اشطب البلاغ .. اساسا انا ماعملت تشريح .. للجثة .. وماممكن تكون في اجراءات قانونية الا بنتيجة تشريح ..
انتو كلكم مفلسين ومحتاجين زي انا .. الله يعين الجميع ياخوي دقيقة انا هسع بطلعك ..
عمك البشرى وقع الاقرار لكن ناس الحركة حبسوهو تاني بي تمواد تانية .. القيادة باهمال ..
وعدم الترخيص وحاجات كدا ..
المهمة البشرى اخلى طرفو .. ومشى قال لاهل الولد قال نحن عفيناهو ..
لاننا محتاجين للعفو من ربا العالمين ..
انا ياجماعة ماممكن اقعد اتجرجر مع ولد بربي في اخوانو وابوهو عيان .. ومراة ارملة بتربي في ايتام .. انا ولدي مال الدنيا كلو مابرجعو لي .. برجاها عند الله سوقو ولدكم وامشو ..
طبعا البشرى شكلو الظاهري بوريك تماما كيف هو وضعه المادي ..
والجماعة ديل شكلهم اغلبيتهم .. ناس قروش وغندله .. بقو يعاينو للبشرى مبهوتين وخجلانين ..
في وقفتو معاهم ديك بكري جا داخل وفرحان وماعارف ده ابو الولد قال للجماعة فرجت والحمد لله ..
قالو ليهو اها .. قال ليهم طلعت الشهادة بتاريخ قبل تلاتة يوم ..
موش جيت سريع .. ؟؟ البشرى قال ليهو كدي الشهادة دي ..
مسك منو الشهادة وقال ليهو .. انا ابو الولد المات وماعايز منكم شي ..
وشيط.. شيط .. شررط الشهادة وقال ليهو امشي طلع شهادة حقيقية بتاريخ حقيقي ..
واتذكر انو في قيامة وحساب ..
وطلع خلا الناس ديل كلهم في حالة صدمة حتى العساكر ..
يلا نمشي نشوف ثويبة وصلت وين ..
ثويبة بعد وصلت المدرسة ودخلت اخوها .. كانت ما مطمئنة وخايفة على اخوها ده خوف شديد ..
لانو ولد اروش وشقي ولمن كان معاهو احمد شوية كدا كانو مطمئنين عليهو ..
بس هسي مافي زول يراعيهو ويتابعو ..
وهو يادوب في رابع ..
يازول بعد دخلتو المدرسة ومستعجلة لانو زمن الشركة كبس .. وهي طالعة كدا اتفاجأت بي عامر واقف قدام المدرسة .. قال ليها خلاص اها وصلتيهو واطمأنيتي عليهو . وانامنتظرك نمشي الشركة مع بعض ..
قدر مافكرت بي طريقة تزوغ بيها وتعتذر مالقت ..
قالت ليهو حاضر وفتحت الباب وركبت معاهو .

الحلقة ــ .. 8
بقلم طارق اللبيب ..
ثويبة كان قلبها بضرب شديد ..ومتوترة من الركبة دي .. وقاعدة قعدة غريبة .. زي الزول الخايف من دبيب يجيهو طالع من الواطه .. متوترة .. العربية مكيفة والزول فاتح التكييف من الصباح .. وبرضو ثويبة عرقانة .. وقطرات العرق فوق جبينها .. زي حبات السكسك ..
مد يدو طلع منديل ورق من صندوق قدامو .. ومداهو ليها وهو سايق .. قال ليها اتفضلي .. حقو ماتخافي على اخوك خوف قدر ده ..
وشالت المنديل قشت وشها وجبهتها وهي ساكتة ..
وهو بدا يتكلم معاها عشان يكسر جو التوتر الغريب ده .. قال ليها انتي ماعندك صاحبات ياثويبة؟
قالت ليهو عندي صاحبات كتار ..
قال ليها كلهم زيك كدا ؟
قالت ليهو زي كيف يعني ؟ في شنو مثلا" ؟
قال ليها خوافين وجبناء .. واخد ليهو ضحكة ..
قالت ليهو .. والله فيهم الخوافة وفيهم الشجاعة .. بس انا فعلا خوافة وقلبي ورقة بس ..
قال ليها بالنسبة لايمانك المفروض ماتكوني خوافة كدا ..؟
قالت ليهو .. الايمان وين قاعد لي ؟..
قال ليها بالمناسبة انا معجب بطريقتك في الكلام .. قالت ليهو تكرم والله وده من ذوقك طبعا"
وواصلت في الكلام قالت ليهو .. ممكن أسالك سؤال؟ سؤال محيرني شديد..
قال ليها قولي نسمع ..نشوف السؤال ..
قالت ليهو انت عرفت بيتنا كيف؟ والكلمك منو انو اخوي اتوفى ..؟
قال ليها دي قصة طويلة بحكيها ليك وقت تاني ..
قالت ليهو خير .. نحن اتأخرنا شديد شكلنا .. وقرشي الليلة الشغل بكتر عليهو ..
قال ليها ماتهتمي بالموضوع .. انتي اساسا المفروض الليلة ماتجي ..
لكن اصرارك اسوي ليك شنو؟ وصراحة انا كان نفسي تمشي الشركة الليلة ..
عشان كنت عايز اتكلم معاك في مواضيع مختلفة لكن انتي هسي مامدياني اي فرصة ..
قالت ليهو مواضيع بتخض الشغل يعني ؟
قال ليها .. فيها البخص الشغل وفيها البخصك انتي ..
ممكن أسالك انا كمان سؤال؟ قالت ليهو اتفضل..
قال ليها انتي اصلا ماجربتي .. دخلتي في علاقة ؟ يعني فترة الجامعة كلها ماكان عندك علاقة مع انسان ..
قالت ليهو حصل والله .. كان عندي علاقة طيبة مع واحد اسمو اسامة .. وكنت بتمنى اني ارتبط بيهو ..بس في موقف كدا خلاني اكرهو وانهي العلاقة .. في اخر شهرين في الجامعة ..
قال ليها ممكن تحكي لي الموقف ..
قالت ليهو لالا مافي داعي .. ده موضوع انتهى .. وهو لانو هسي مافيش مافي داعي اقول حاجة عنو ..قال ليها بس وريني التصرف احتمال تصرفو مايكون غلط ..
قالت ليهو طيب بقول ليك .. يوم كنا بنتكلم عادي .. قام خت يدو فوق يدي كدا .. وانا بقيت بعاين ليهو مستغربة ..
لانو اول مرة يتصرف كدا .. وبدا يلامس في يدي ملامسة ماطبيعية كدا ..
طوالي نتلت منو يدي وقلت ليهو .. انتهينا .. وتاني مالاقيتو نهائي ..
لانو ما ممكن اثق في زول زي ده .. انا ما اتزوجته كيف بهبش يدي ..
معناها ممكن يهبش يد اي واحدة ما زوجته بعدين .. وانا ما بكون مطمئنة مع شخص زي ده ..
عامر سكت سااااااي ..
قال ليها يعني هسي دايرة تقنعيني انو انتي رفضتي حبيبك عشان لمس يدك ؟
قالت ليهو ده الحاصل.. لاني اصلا اعجبت بيهو لانو بخاف من ربنا وزول متدين وكدا ..
لكن في الزمن بقينا ماعارفين البطيخ من القرع ..
زول تلقاهو يتكلم باسم الدين .. وهو حرامي ومختلس .. لغاية ما الناس بقى ماعندها ثقة في المتدينين .. وكل ما ندي الثقة بسبب الادعاء والمظاهر بنتصدم بواقع مأساوي ..
انا بشوف اي زول بتكلم عن الدين وبمثل الوجه الاسلامي .. المفروض يكون اكتر زول بعيد من الظلم والتعدي عشان ضعاف القلوب مايكرهو الدين ..
لكن في النهاية الزول العاقل بقدر يفرق بين الالتزام والادعاء ..
قاليها ياثويبة الدين في القلب .. والناس دي كلها بتغلط .. ومافي زول معصوم من الغلط ..
انتي كيف ترفضي انسان مستقيم بي سبب غلط واحد يعني انتي منزهة من العيوب؟
قالت ليهو انا كلي عيوب عارفة كدا ..بس والله حسيت باني فقدت فيهو الثقة ..
واي زول تفقد فيهو الثقة المفروض تفارقو .. بدل ماتعيش معاهو وانت شاك فيهو صح ولالا؟
قال ليها طيب وتاني مافي علاقة ؟ قالت ليهو ابدا" ..
قال ليها يعني هسي في الفترة دي قلبك خالي تماما" من العشاق ..
قالت ليهو الحمد لله لا هم ولاوجع قلب ..
قال ليها ليه تسمي الحب هم ووجع قلب ؟.. انتي تفكيرك غريب جدا ياثويبة ..
قالت ليهو انا حاسة بانو الزول البنفع معاي لسع ماجا .. ومالاقيتو لحدي اللحظة ..
قال ليها مواصفاتو شنو الزول ده .. ؟
قالت ليهو لازم يكون تفكيرو غريب زي تفكيري كدا ..
فقع فقع فقع .. قعد يضحك لامن بضرب في الدركسون بيديهو .. وقال ليها والله ختيتيها لي ختة معلم ..في الزاوية الشمال ..
المهم الونسة كلها هي شايتة شرق وهو شايت غرب ..
وحس انها كل كلامها ماعايزة تديهو فرصة يبني معاها اي علاقة ..
المهم وصلو الشركة .. ونزلت عادي جدا .. بس عمك عبد القادر .. واقف في البلكونة عايز يتف سفة ..وشافها جاية راكبة مع عامر ونازلة تتبسم ..
عبد القادر خش على الجماعة المعاهو قرشي والتاني داك ..قال ليهم ..
والله ياجماعة انا قلت البت الجديدة دي حتكون صعبة على عامر لكن عامر ده كتال كتلا .. عليك امان الله البت في اليوم التاني لوظيفتها راكبة في الليكزس .. يالطيف غايتو هاهاها ..
قرشي قال ليهو منو دي اوعة تكون ثويبة ؟؟
قال ليهو ياها ؟؟ قال ليهو انا مابصدقك ثويبة مستحيل تركب مع عامر ..
انا قريت شخصيتها من اول يوم .. بس انت تكون ماركزت ..
عمك قال ليهو هسي هي حتكون وصلت المكتب.. امشي ليها واسالها .. لو قالت ليك ماكنت راكبة مع عامر يبقى انا اعمى ولا بكضب ..
بس انا لازم اوصل الخبر ده لي (داليه ).. هاهاها وباكر الشكلة تعمر ..
بس البت دي الاسمها ثويبة ماعارف.. اصلو قلبي ما رادها .. ياخي مدعية عاملة فيها الشريف بركات .قرشي قال ليهو ياخي انت راجل كبير .. وبناتك بكونو اكبر منها .. ياخي احترم شيبة راسك
ده شنو الكلام بتاع الشفع البتقول فيهو ده ..؟
وطلع قرشي يتمتم وينقنق ويهز في راسو ..
مشى المكتب وفعلا لقى ثويبة يادوب جات .. قال ليها صباح الخير .. كانت بتنفض في الطرابيز وبترتب في الملفات ..
قال ليها لو سمحتي ممكن اتدخل في حاجة شخصية لمصلحتك ..؟
قالت ليهو اتفضل طوالي ياقرشي انت زي اخوي ومن حقك تامر وتنهى ..
قال ليها قولي لي الحقيقة .. واتمنى ماتخيبي ظني فيك . انتي جيتي الشركة بشنو .. يعني راكبة شنو؟؟..

الحلقة 9
بقلم طارق اللبيب ..
ثويبة قالت ليهو طبعا" ياقرشي شكلك انت شفتني نزلت من عربية عامر .. لكن والله ركبت معاهو غصبا" عني.. انا بحكي ليك الحصل بالضبط شنو .. وحكت ليهو انها ومامن عادتها تركب عربات خاصة.. وانو عامر جاهم في البيت لوفاة اخوها وكدا يعني .. قال ليها هسي انتي اخوك اتوفى امس؟؟
قالت ليهو نعم الحمد لله ربنا يتقبله .. قال ليها سبحان الله .. غايتو احسن حاجة انا ماشي بيها.. اني مابظلم زول الا اتاكد من المواضيع .. شوفي هسي اي زول ماعارف قصتك دي ..وشافك وانتي راكبة مع عامر مابظن بيك خير ..
قالت ليهو بس ياقرشي عامر مالو؟ .. انا ماشايفة عليهو اي حاجة كعبة .. قال ليها انا كمان مامن عادتي اتكلم في الناس.. بس بوصيك اعملي حسابك شديد .. وخلي بالك من نفسك ..
قالت ليهو ربنا يجزيك خير .. ووصيتك على راسي ..
قرشي من اولاد الفلاتة الحمر.. المستوطنين في بحري من زمن بعيد .. ومربى تربية الفلاتة .. الدين والورع والذكر والصلاة في مواعيدها .. وزول دغري زي السيف ..
ومابحب الملعبة والكلام الفاضي .. بس عيبو انو زول احمق لو حس باي حقارة بلطش طوالي بدون اي مفاهمة.. عشان كدا الشركة كلها بتهابو ..
على كل حال بدأ شك حقيقي يدب في قلب ثويبة من ناحية عامر .. لانو قرشي راجل واضح المعالم.. فما ممكن يقول عن عامر كلام هو غير حاصل .. ومع انو ما اتكلم فيهو كلام مباشر ..
لكن برضو كونو يوصيها انها تبعد منو ده معناها انو (في أن في الموضوع) ..
عبد القادر طوالي مشى لي دالية بعد عشرة دقايق من طلعة قرشي .. لقاها في المخزن مركبة نظاراتها الشمسية .. فوق راسها من فوق
وشايلة دفترها ومتابعة التحميل ..
دالية موظفة في الشركة في قسم التوزيع .
قال ليها دالية تدفعي كم عندي كلام احر من الشطة ..
قالت ليهو انت يا قدرورة كلاماتك اصلها ما بتنتهي .. هسي انا مافاضية ليك اول ما اخلص بجيك في مكتبك ..
قال ليها سريع عشان القصة بتخص كلتشي ..
وفعلا خلصت وجاتو في المكتب وحكا ليها القصة بطريقة مقلبنة شديد ..
قال ليها طبعا انتي ماشفتي ملكة الجمال الجديدة الجابها عامر ؟
قالت ليهو ابدا ماشفتها اسمها منو ؟ قال ليها ثويبة بشرى . قالت ليهو سمعت الصباح البنات بتكلمن ..
اها الحصل ؟؟
قال ليها ياستي الزول طالع ونازل معاها .. ومما اشتغلت مانزلت من العربية وبوصلها وبجيبها ..
قالت ليهو .. انا بطيرها زي ما طيرتها القبليها ..
شغالة وين هسي هي .. قال ليها في الحسابات .. قالت ليهو كمااااااان؟؟
قال ليها دي شكلها بعد اسبوع بتبقى نائب المدير العام ..
دالية دي منو ح نعرف لقدام ..
المهم يازول داليا اضمرت نية الشر على ثويبة بدون ماتعرف اي حاجة ومن كلام قدورة بس ..
ومشت طوالي بي قدام مكتب ثويبة ولقتها منهمكة في الشغل والحسابات ..
عاينت ليها من برة كدااا.. واتاكدت منها كويس .. ومن جواها بتغلي .. قالت هسي دي اسمح مني في شنو؟ .. الله اكبر عليها .. اقسم بالله اوريها ليك عمايل ..
والمصادفة العجيبة داليا مشت مكتب الادارة .. لقت عامر خالف كراعو وبتكلم عن ثويية باعجاب شديد .. مع واحد صاحبو من العملاء ..
اول ماجات داليا تم قطع .. وبقى يبلع في ريقو .. وغير الموضوع سريع ..
قالت ليهو كيف ياعامر.. ؟ اها الزولة الجديدة دي ماعرفتنا بيها قالو بتبقى ليك ..
قال ليها القال منو؟ قالت ليهو انت موش قلت لي عبدالقادر انها قريبتكم ؟؟ قال ليها لا لا بس البت مسكينة ومحتاجة للتوظيف .. مابتبقى لي لكن ناس معرفة والله ..
قالت ليهو خير انا بمشي واتعرف عليها براي ..
ومن دربها داك مشت .. على مكتب الحسابات ولقت ثويبة خلاص دوامها انتهى وماشة البيت ..
سلمت عليها وكيفك ياثويبة ؟ والله سمعت عنك كل خير وقلت اكون ليك صديقة ..
انا شغالة في قسم التسليم والتوزيع .. ويومي كلو في المخازن بي ورا..
اها كيف الشغل الجديد معاك؟ .. انا اسمي دالية .. والبت تربرب .. ما ادت ثويبة اي فرصة تتكلم ..
ثويبة وكت لقت البت دي زولة مرحة وطيوبة ..قعدت انتظرتها تكمل كلامها ..
قالت ليها يادالية والله طبعا" انا جديدة ..
وما بعرف ناس هنا غير عامر بالتحديد .. وعامر زاتو مابعرفو كويس.. اهو اول يوم اشوفو يوم التوظيف .. وانا سعيدة انو في اول ايام لقيت لي صديقة طيبانة .. زيك على الاقل تنوريني ..
وتفهميني الشركة والناس الفيها .. واكون بتعامل بمعرفة ..
قالت ليها والله ياثويبة .. انا حكون ليك اقرب من اختك بت امك وبراك بتشوفي ..
يلا انا شايفاك طالعة .. انا ماشة عشان ما ااخرك ..
ولمن طلعت منها دالية قالت كلمة كدا براحة بينها وبين نفسها .. (بت العفنة براها رمت نفسها)..
والله اعمل ليك فيها عمايل .. والله كمان ده حبكان جديد..
ثويبة طلعت بالدس زي الحرامية طلعت براحه عشان عامر مايحس بيها ويجي يقول ليها عايز اوصلك ..
وبراحة زاغت . وعلى الشارع والمواصلات والبيت ..
هي راكبة كداطلعت الحافلة وقفت في المحطة المقابلة لقصر الشباب والاطفال .. مع لفة السلاح الطبي .. عاينت لواحد في المحطة ببيع تسالي ..على طول مسكتها عبره ودموعها ذرفن ..
لانها اتذكرت انو احمد كان بحب التسالي وهي كل ماتلقا ليها بتاع تسالي لازم تشتري معاها كيس كيسين لاحمد . ويوسف ما بحب التسالي نهائي ..
قشت دموعها وبراحة قالت.. أحي ياقلبي الاتهرد عليك يا احمد اخوي .. وكل ما تقش الدموع تتبهل تاني ..
وبقت مقبلة على الشارع عشان مافي زول من الحافلة يشوفا بتبكي ..
المهم وصلت البيت لقت ابوها موجود .. وفي ضيوف في البيت زي عشرة انفار كدا ومعاهم حريم ..
وعرفت انو ديل ناس عمها ميرغني . واولادو اتننن وبتو ومرتو ..
وكم نفر كدا من اهل ابوها.. جايين من البلد عشان للعزاء ..
لمن ثويبة جات داخلة من برة ..وسلمت ودخلت ..عمها ميرغني وشو اتغير وعيونو اتقلبن حمر ..
وناس البلد بقو يتوسوسو .. لانو ماعندهم بت بتطلع من البيت براها.. وكمان بت البشرى شغالة؟؟..
دي تقريبا" جريمة مكتملة الاركان .. وشكلو عمها ده حيقلب الدنيا فوق راس البشرى ..

لحلقة 10
بقلم طارق اللبيب ..

ــــــــــــــــــــــــــــ
البشرى كان دخل يجيبلو شاي .. والرجال قاعدين قي الغرفة الغربية .. وهي لصق الغرفة الشرقية.. والاتنين فاتحات في برندة واحدة . والبيت كلو متجه جنوب .. فاتح في شارع .والمطبخ صغير واقع شرق البيت وفاتح غرب في الحوش .
يعني البيت ضيق لحد بعيد .. والبرندة مفصولة بستارة .. الستارة شنو؟.. ملايتين قدام مخيتات مع بعض ..وتقريبا اي كلمة تتقال عند الحريم الرجال بسمعوها .. وكمان كلام الرجال وونستهم مسموع ف بيت الحريم ..
وناس البلد طبعا بتكلمو باصوات عالية ..
لمن البشري جا داخل مبتسم شايل الشاي . قال والله انا سعيد بوجودكم معانا ..
ميرغني قال ليهو.. البشرى كدي الدخلة والمرقة دي خلها .. اقعد انا داير انضم معاك ..
ميرغني شقيق البشرى الاكبر .. اكبر منو بسنتين.. ومتربيين مع بعض.. وعارفين طبايع بعض .. ميرغني زول صعب وحار نار بس.. وزول واضح ومابخاف من الجن الاحمر زاتو ..
و زول كان بار بوالديه.. وخدم امو وابوهو لامن شالن الموت
البشرى قال ليهو اتفضل يامرغني خوي نمشي نقعد بيورا ولانقعد قبلنا ؟ قال ليهو لالا نقعد قبلنا ..
ديل ولادي ولاد عمك مافي زولا" غريب . والشي الداير انضم فوقو . بهمنا كلنا .
اولا البت دي داخلة من وين .. نحن لينا ساعتين قاعدين وهي مافيشة ..
وجات داخلة براها .
قال ليهو والله ياميرغني البت كانت في الايام الفاتت دي لافة ليها لي شغل وهسع الحمد لله لقت لها شركة كويسة وناسها كويسين واشتغلت دابها .
قال ليهو يا البشرى والله الخرتوم خربتكم تب . واظنك بقيت تابع الحريم .
نحن ياخوي ماعندنا بت بتشتغل . وبالخسوس في بلدكم دي . الفساد الفيها البت عند اهلها عليها خوف
كمان تفكها تمشي تشتغل بي راحتها وتجي داخلة وكت مي دايرة وانت ولا هماك؟
البشرى خت الشاي وسكت ساي شوية كدا وقال لي عمر ود مرغني قوم ياعمر كب الشاي ...
عمر قعد يكب في الشاي للناس والبشري قال لي ميرغني .. ميرغني اخوي .. انت ماتزعل روحك يكفيك انك تامر وتنهى ونحن ننفذ .. لكن داير اقول لك كلام بس اسمعني ..
البت كان في البيت كان في الشارع البحرسها قلبها وخوفها من ربها ووخوفها علي شرفها واهلها ..
انا كنت ساكن في البلد يا خوي .. وعارف انو في بنات زمان كان مابمرقن من البيت .. حملن بالحرام .. وانا وانت شاهدين .. وسون العيب ..
وحتي في كل مكان في جرايم بتحصل في البيوت كانالسبب انو البنات ديل ما مربيات ..
بعدين منو القال نحن ماعندنا بنات بشتغلن ويمرقن ؟.. في البلد من زمان البت بتمرق وتمشي ترد الموية
وتمشي تحش القش من الزراعة .. وترعى الغنم .. ده شغل ولا موشغل ؟
بعدين عمتي فاطنة بت عمر .. من هي شافعة بتخيت الهدوم وتمشي تبيعها في سوق التلاتا .. لامن بقت حبوبة مافي زول قدر جاب فيها كلمة ..
قال ليهو بلدنا يا البشرى مي زي الخرتوم .. البشرى قال ليهو القال منو يا البشرى ..
ناس الخرتوم ديل ياهن ناس البلد .. وانا مثال ..
انت نسيت يومنا الكنا جايين الدغش من حفلة الحاج ود صديق .. لقينا لينا شافع مجدوع في الكوشة مخنوق بي كيس ؟
المعاصي يا ميرغني موجوده في كل الارض.. والزول الصالح صالح كان في مكة وكان في باريس ..
ثويبة سمعت النقاش مدور بين ابوها وبين عمها ..
وابوها بتكلم بالمنطق .. وعمها منفعل ويكورك .. جات طوالي لافة طرحتها ..وقالت السلام عليكم ياعمي
وقفت جمب الباب.. وقالت.. يا عمر عليك الله ناولني عدة الشاي دي ..
ياعمي خلاص.. انا سمعت كلامك ..وتاني ماطالعة من البيت .. وشالت العدة وطلعت..
الناس ديل صنننن صنو ؟ عمر ودميرغني ..قال لابوهو يابا والله انا شايف كلام عمي منطقي.. والجماعة التلاتة الكانو قبيل بوسوسو .. وافقو على كلام عمر ودميرغني .. ..ميرغني طبعا شكلو اتحرج من كلام البت .. وماكان متوقع انو يكون ده يكون موقفها ..
وبقى خجلان من كلامو.. وداير يتراجع لكن قوة الراس عاملة عمايل .. بينو وبين نفسو .بقى يراجع في كلامو القالو ..
وعرف انها سمعت كلامو .. وزينب متابعة الحاصل من المطبخ .. وقاعدة تغلي من جوة .. عليك شوف الراجل المتخلف ده .. ده لاهسع في قصة ماعندنا بنات بشتغلن .. غايتو الله يدينا الصبر .. والله انا كان ما عاملة حساب لي بشرى.. ادخل عليهو هسع اوريهو ليك المابعرفو ..
ثويبة دخلت شايلة عدة الشاي .. لقت امها مولعة قالت ليها يا امي الصبر .. الموضوع ده بسيط نحن بنرضيهو .. وبالحناسة بقتنع .. هو حاسي بانو كبير العايلة .. ولازم نحن نحترم قراراتو ..
وبالهداوة كل شي بجي ..
قالت ليها اهلك ديل غايتو مابجي من وراهم خير .. هسع هن جايين يخففو علينا ولاجايين ينكدو علينا حياتنا ؟.
.هناك ميرغني بتكلم مع ولدو .. قال ليهو نحن هسع مانعارفين الحتة الشغالة فيها دي وين؟.. وناسها كيفنهن .. هسي امكن شغالة مع الناس الكدي ديك .. والله ديل مايخافو فيها الله ..
البشرى حس انو ميرغني بدا يتراجع .. قالو خلاص يا ميرغني اخوي .. باكر نمشي انا وانت نزور الشركة.. كان لقيتها نافعة نخليها تواصل .. وكان لقيتم مونافعين تاني مابتعتب عليها ..
قالو سمح خلاص كدي نادي لي البت ..
جاتو .. قال ليها اسمعي يابتي .. والله انا بقول في الكلام ده عشان خايف عليك .. والله نحن بنوتنا لابعيبن لابجيبن العيب .. لكن بس ترا نحن شفقانين وقلوبنا كعبة .. بنخاف عليكن ..
ثويبة اتاثرت بكلام عمها .. وعرفت كيف الزول ده من جواهو طيب وحساس .. بكورك ساي ..
قالت ليهو والله انا عارفة كدا ياعمي .. لكن والله اطمنك .. نحن مابنجيب ليكم الا العزة ورفعة الراس ..عاين ليها كدي وقال لها ماشاء الله عليك .. على الطلاق البشرى رباك يابتي ..
انا شايف الناس كلهم وقفو معاك .. ده معناها انتي ماشة صاح .. انا واثق في تربية اخوي البشرى وفي عقلك .. كان متأكدة ناس الشغل ديل ناس بخافو الله .. امشي
ومرة قال اللبيب ..
غرضك بنقضــى ويتنفذ المطـــلوب .
اكان هديت كلامك وقلتو بي اسلوب .
الطالبلو شي .وقال الطلب مغضوب .
بصد شايل قماحو .وربما مضروب .
ثويبة مشت لامها في المطبخ وقالت ليها .. شفتي يا امي عمي طيب كيف ؟ براك استعجلتي وحكمتي عليهو ..
قالت ليها هوي عليك الله امشي كدي .. ماتشكري لي الراكوبة في الخريف .. في النهاية عربشــن متخلفين ..
قالت ليها معقول يا امي ؟ عل الاقل راعي لمشاعري يابت امدرمان .. امهما كتمت ضحكة وفجأة كدا دميعاتها نزلن ..
قالت ليها مالك يا امي؟ .. قالت ليها اتذكرت احمد ولدي .. وقت يكون عايز يضحك وماعايز ابوك يسمعو .. بكتم الضحكة كدا.. ويخت يدو فوق خشمو ..
ثويبة قالت ليها صح والله .. خلاص يا امي .. غيري الموضوع ..
المهم الموضوع بتاع الشغل انتهى .. براحة بي سبب احترام البشرى وثويبة لي المك ميرغني ..
واليوم اتواصل كلو ونسة وحكايات من البلد واخبار الناس .. والمحن البتحصل في الحلة .. النسوان راقدات بي ورا في الزقاق الشمالي .. وماسامعات الونسة .. المهم مع انو البيت نص وضيق شال الناس ديل كلهم بكل راحة وطيبة نفوس ..
وباكر الدغش الجماعة قامو يكوركو .. عمر فلان فلان قومو سريع النحصل الباصات
وزرينب قامت الواطة ضلمة تسوي في الشاي عشان الناس ديل مايمرقو بلا شاي ..
ويادوب مالبسو وجهزو الشاي كان جاهز وشربو ومرقو ..
الناس كلهم اتقدمو ماشين وميرغني اتأخر ومسك البشرى .. قال ليهو عندي معاك شورة في موضوع ..
خل الناس ديل يمشو شوية انت انتاخر والكلام ده في الشارع
قال ليهو.. قول ياميرغني اخوي مافي زول سامعنا ..